Արևային օդատաքացուցիչների հետազոտություն և նախագծում աշխատաժողով

Կայուն Զարգացման Ներդրումային Հիմնադրամը մասնակցեց «Արևային օդատաքացուցիչների հետազոտություն և նախագծում. տեխնիկական և ֆինանսական տեսանկյունից կիրառելիությունը Հայաստանի մարզերում» թեմայով աշխատաժողովին

Առաջին անգամ Հայաստանում իրականացվում է «Արևային օդատաքացուցիչների հետազոտություն և նախագծում. տեխնիկական և ֆինանսական տեսանկյունից կիրառելիությունը Հայաստանի մարզերում» թեմայով ուսումնասիրություն։ Ուսումնասիրության շրջանակում հոկտեմբերի 8-ին կազմակերպվել էր աշխատաժողով-տեխնիկական քննարկում, որի ժամանակ ներկայացվեցին արևային օդատաքացուցիչների միջազգային կիրառությունը և վերջիններիս էներգաարդյունավետության և այլ տեխնիկական բնութագրերի գնահատման համար առաջարկվող մեթոդաբանությունը, ներառյալ մեթոդաբանության փորձարկման որոշակի նախնական արդյունքներ:

Կայուն Զարգացման Ներդրումային Հիմնադրամը ինչպես նաև այլ շահագրգիռ կառույցների ներկայացուցիչներ մասնակցեցին աշխատաժողովին։ Աշխատաժողովը կազմակերպվել էր «ԵՄ-ն հանուն Հայաստանի համայնքներում էներգաարդյունավետության և վերականգնվող էներգիայի» ծրագրի շրջանակում, որը համաֆինանսավորվում է Եվրոպական միության կողմից և իրականացվում է Գերմանիայի Դաշնային Հանրապետության տնտեսական համագործակցության և զարգացման նախարարության (ԳԴ ՏՀԶՆ) պատվիրակմամբ Գերմանական միջազգային համագործակցության ընկերության (GIZ) կողմից իրականացվող ԷԿՈսերվ ծրագրի շրջանակում: Միջոցառման ընթացքում Կայուն Զարգացման Ներդրումային Հիմնադրամի աշխատակիցների կողմից ներկայացվեցին նաև առաջարկներ Հայաստանի Հանրապետությունում արևային օդատաքացուցիչների կիրառելիության վերաբերյալ։