«Լավագույն փորձի ընդլայնման համար ռեսուրսների մոբիլիզացման 3 պլանների մշակման, Լոռու և Սյունիքի մարզերի շահագրգիռ կողմերին հողերի համապարփակ կառավարման և արոտավայրերի կառավարման պլանների ներկայացում» Ծրագրի շրջանակներում Կայուն զարգացման ներդրումային հիմնադրամի գլխավոր տնօրենի տեղակալ Վահան Դավթյանը և ծրագրի խորհրդատուներ Ռուբեն Սարուխանյանն ու Արթուր Գոմկցյանը և ՀՀ շրջակա միջավայրի նախարարության Բնապահպանական ծրագրերի իրականացման գրասենյակ պետական հիմնարկի ներկայացուցիչները հանդիպում ունեցան Գերմանական միջազգային համագործակցության ընկերություն (ՄՀԸ/GIZ) ՍՊԸ-ի Հայաստանյան գրասենյակի կայուն ռեսուրսների կառավարման և կենսաբազմազանության խորհրդատու Լևոն Մովսիսյանի հետ: Հանդիպման նպատակն էր քննարկել ռեսուրսների մոբիլիզացման պլանների շրջանակներում համագործակցության հնարավորությունները:
Հանդիպման ընթացքում Վ.Դավթյանը ներկայացրեց Ծրագրի նպատակը և ուրվագծեց ազգային, մասնավոր և միջազգային շահագրգիռ կողմերի ֆինանսական և տեխնիկական ռեսուրսների մոբիլիզացման ուղիները: Լևոն Մովսիսյանը ներկայացրեց կազմակերպության փորձառությունը և պոտենցիալ դերը հողերի դեգրադացիայի չեզոքացմանը նպաստելու հարցում:
Ծրագրի նպատակներից է հողերի կայուն կառավարումը, իսկ Ծրագիրը հանդիսանում է ՄԱԿ-ի Պարենի և գյուղատնտեսության կազմակերպության ֆինանսավորմամբ ՀՀ շրջակա միջավայրի նախարարության Բնապահպանական ծրագրերի իրականացման գրասենյակ պետական հիմնարկի կողմից իրականացվող «Հայաստանում հողերի դեգրադացման կանխման հանձնառությունների/պարտականությունների իրականացումը` դեգրադացված մարգագետինների կայուն կառավարման և վերականգնման միջոցով» դրամաշնորհային ծրագրի մաս։
