«Կլիմայի խոստում» խորագրով քննարկման մասնակցություն
Կայուն զարգացման ներդրումային հիմնադրամը՝ կարևորելով պետություն-մասնավոր գործընկերության ամրապնդումը և մասնավոր հատվածի ներգրավվածությունը կլիմայի փոփոխության օրակարգի, մասնավորապես Ազգային մակարդակով սահմանված գործողություններ (ԱՍԳ) գործընկերության պլանի իրականացման գործընթացներում, ս/թ օգոստոսի 10-ին մասնակցել է ՄԱԿ-ի Զարգացման ծրագրի (ՄԱԶԾ) «Կլիմայի խոստում» խորագրով նախաձեռնությանը:
Քննարկումների շարքը նվիրված է բարենպաստ քաղաքականության, ֆինանսավորման գործիքների և տեխնոլոգիական առաջընթացի վերաբերյալ հարցերի լայն շրջանակին՝ պետական հաստատությունների, մասնավոր ընկերությունների և անհատ խորհրդատուների մասնակցությամբ։ Անդրանիկ միջոցառումն ուղղված էր ՀՀ կառավարության Էներգետիկ քաղաքականության նպատակների քննարկմանը, ներառյալ էլեկտրաէներգիայի սակագնային քաղաքականության արդյունավետության բարձրացման, հաշվառման համակարգերի արդիականացման, կուտակիչ կայանների կառուցման կարևորությանն ուղղված հարցերին, ինչպես նաև ինքնավար արտադրողների համար զարգացման երկարաժամկետ հեռանկարի ապահովման հարցերին:
Մեկնարկային քննարկմանը մասնակցում էին նաև Կայուն զարգացման ներդրումային հիմնադրամի գլխավոր տնօրենի տեղակալ Ռուբեն Եղոյանը և բնապահպանական ծրագրերի ղեկավար Վահան Դավթյանը: Վերջիններս հանդես եկան կոնկրետ հարցադրումներով, ըստ էության առաջարկեցին կարճաժամկետ, միջնաժամկետ և երկարաժամկետ միջոցառումներ, կարևորեցին ակումուլյացիոն, մասնավորապես հիդրոակումուլյացիոն կայանների կառուցումը և դրանց իրագործման մեխանիզմները, ինչպես նաև արևային կայանների զարգացումը:
