Համայնքային կայուն էներգետիկայի համաժողով
Կայուն Զարգացման Ներդրումային Հիմնադրամի գլխավոր տնօրենի տեղակալ Ռուբեն Եղոյանը և փորձագետ Լիանա Կարապետյանը ս.թ. ապրիլի 25-ին «ԵՄ-ն հանուն Հայաստանի կայուն էներգիայի» (EU4ASEP) ծրագրի շրջանակներում մասնակցել են Համայնքային կայուն էներգետիկայի համաժողովին:
Միջոցառմանը մասնակցել են Տարածքային կառավարման և ենթակառուցվածքների նախարար Գնել Սանոսյանը, Հայաստանում ԵՄ պատվիրակության ղեկավար Անդրեա Վիկտորինը, Հայաստանի համայնքների միության նախագահ Էմին Երիցյանը, ՀՀ համայնքների, մասնավոր ընկերությունների, դոնոր կազմակերպությունների ներկայացուցիչներ և այլք:
Ծրագրի իրականացումը սկսվել է 2018 թվականին և ամփոփվելու է 2022 թվականի ապրիլի 25-30-ը նախատեսված իրազեկման շաբաթով:
Հայաստանում Եվրոպական միությունը Քաղաքապետերի դաշնագրի ներքո մշակել է համայնքի կողմից ղեկավարվող վերականգնվող էներգիայի արտադրության և էներգիայի կայուն փոխակերպման կենսունակ մոդել Արթիկ և Ապարան քաղաքներում: Արթիկում ֆոտովոլտային կայանքն, օրինակ, ունի 600 ԿՎտ հզորություն՝ տարեկան 1335 ՄՎտժ էլեկտրաէներգիայի արտադրությամբ, և ջերմոցային գազերի արտանետումները տարեկան 570 տոննա CO2-ով նվազեցնելու կարողություն: Միջոցառումը կազմակերպել էին նախագիծն իրականացնող գործընկերները՝ Էներգետիկայի և Էներգախնայողության հիմնադրամը (ESF) և Հայաստանի համայնքների միությունը (ՀՀՄ): Եվրոպական միությունը կարևորում է Հայաստանի համայնքներում կայուն էներգիան խթանող ծրագրերը՝ աջակցելով դրանց իրականացմանը։
Էներգախնայողության աջակցման հիմնադրամի տնօրեն, «ԵՄ-ն հանուն Հայաստանի կայուն էներգիայի» ծրագրի ղեկավար Աստղինե Պասոյանը ներկայացրել է EU4ASEP ծրագրի ձեռքբերումները. «EU4ASEP ծրագիրը նաև իրականացրել է մի շարք նախագծեր՝ ապահովելով թիրախային համայնքների, քաղաքապետարանների աշխատակազմի մասնագիտական կարողությունների զարգացման և բնակչության իրազեկվածության մակարդակի բարձրացման համար»:
