ՌԵՍՈՒՐՍՆԵՐԻ ՄՈԲԻԼԻԶԱՑՄԱՆ ԱԶԳԱՅԻՆ ՊԼԱՆԻ ՎԵՐԱԲԵՐՅԱԼ ԱՇԽԱՏԱԺՈՂՈՎ
Կայուն Զարգացման Ներդրումային Հիմնադրամը սույն թվականի ապրիլի 10-ին ք. Երևանում Անի Պլազա հյուրանոցում «Լավագույն փորձի ընդլայնման համար ռեսուրսների մոբիլիզացման 3 պլանների մշակման, Լոռու և Սյունիքի մարզերի շահագրգիռ կողմերին հողերի համապարփակ կառավարման և արոտավայրերի կառավարման պլանների ներկայացում» Ծրագրի շրջանակներում ներկայացրեց Հիմնադրամի մասնագետների կողմից մշակված Հողերի դեգրադացիայի չեզոքացմանն ուղղված ռեսուրսների մոբիլիզացման ազգային պլանը (ՌՄՊ): Միջոցառմանը մասնակցում էին Տարածքային կառավարման և ենթակառուցվածքների, Շրջակա միջավարի, Էկոնոմիկային նախարարույունների ներկայացուցիչները, գյուղատնտեսության և բնապահանության ոլորտների միջազգային ու տեղական կազմակերպությունները, այդ թվում հիմնադրամներ և ՀԿ-ներ:
Բացման խոսքով հանդես եկան ՀՀ շրջակա միջավայրի նախարարի տեղակալ Տիգրան Գաբրիելյանը, Կայուն Զարգացման Ներդրումային Հիմնադրամի գլխավոր տնօրեն Հայկ Բադալյանը և Հայաստանում ՄԱԿ-ի Պարենի և գյուղատնտեսության կազմակերպության ներկայացուցիչ Գայանե Սիմոնյանը:
ՌՄՊ-ների մշակումը հանդիսանում է ՄԱԿ-ի Պարենի և գյուղատնտեսության կազմակերպության ֆինանսավորմամբ ՀՀ շրջակա միջավայրի նախարարության Բնապահպանական ծրագրերի իրականացման գրասենյակ պետական հիմնարկի կողմից իրականացվող «Հայաստանում հողերի դեգրադացման կանխման հանձնառությունների / պարտականությունների իրականացումը` դեգրադացված մարգագետինների կայուն կառավարման և վերականգնման միջոցով» դրամաշնորհային ծրագրի մաս։
ՌՄՊ-ն նպատակ ունի նպաստել հողերի դեգրադացիայի չեզոքացման և կայուն կառավարման գործընթացների ֆինանսավորման, կարողությունների զարգացման և համակարգված կառավարման արդյունավետության բարձրացմանը։ Այն առաջարկում է մոտեցումներ և գործիքակազմ, որոնք թույլ են տալիս ապահովել կայուն ֆինանսավորում և աջակցություն հողերի վերականգնման և դեգրադացիայի կանխարգելման ծրագրերի իրականացման համար։
Ներկայացված ՌՄՊ-ով քարտեզագրվել և մեկ տեղում ամփոփվել է տարբեր շահակիցների այն ծրագրերն ու ջանքերը, որոնք ուղղված են հողերի վերականգնմանը, գյուղատնտեսության կայունության բարձրացմանը, ջրային և հողային ռեսուրսների արդյունավետ կառավարմանը, գյուղատնտեսական տեխնոլոգիաների նորարարական լուծումների ներդրմանը և համայնքների ներգրավմանն ու կարողությունների զարգացմանը:
ՌՄՊ-ն ներառում է առկա մարտահրավերների և բացերի վերլուծություն, ներկայացնում է շահակիցներին ու գործընկեր կառույցներին, ինչպես նաև առաջարկում է համակարգված մոտեցում, ներառյալ պետական և ոչ պետական ֆինանսավորման, մասնավոր ներդրումների ու դոնոր աջակցության ձևաչափերը։
Հանդիպման ընացքում տեղի ունեցան արդյունավետ քննարկումներ, ինչպես նաև ներկայացվեցին առաջարկներ պլանի լավարկման նպատակով:
