Վերականգնվող էներգետիկան ՀՀ էներգետիկ համակարգի զարգացման հեռանկարներում
Հոկտեմբերի 15-17-ը Վանաձորում իրականացվել է «ՀՀ էներգետիկ համակարգի զարգացման հեռանկարները. վերականգնվող էներգետիկան որպես էներգետիկ հիմնախնդիրների լուծման հիմնասյուն» խորագիրը կրող եռօրյա դասընթացների 2-րդ փուլը, ինչին մասնակցել է Կայուն Զարգացման Ներդրումային Հիմնադրամի արևային էներգետիկայի փորձագետ Վարդան Պետրոսյանը:
Դասընթացին մասնակցել են նաև Լոռու մարզի ՏԻՄ ներկայացուցիչներ, հասարակական կազմակերպությունների, զանգվածային լրատվության ներկայացուցիչներ, ուսանողներ և բիզնես ոլորտի ներկայացուցիչներ։ Եռօրյա դասընթացների շրջանակներում քննարկվել են վերականգնվող էներգետիկայի և էներգախնայողության հիմնահարցերը: Կայուն Զարգացման Ներդրումային Հիմնադրամի փորձագետի կողմից բարձրաձայնվել են վերականգնվող էներգետիկայի առավելության, առկա խնդիրների և դրանց լուծման, ինչպես նաև հեռանկարներին ու զարգացմանը վերաբորվող հարցերը:
Քննարկումների արդյունքում առաջարկվեց ազգային, մարզային և համայնքային մակարդակներում միջոցառումների համալիր՝ հանրապետությունում էներգախնայողության և էներգաարդյունավետության մակարդակը բարձրացնելու համար, կարևորվեց ակումուլյացիոն, մասնավորապես հիդրոակումուլյացիոն կայանների կառուցումը և դրանց իրագործման մեխանիզմները, ինչպես նաև արևային կայանների զարգացումը:
Դասընթացների շրջանակներում կազմակերպվել են նաև այցեր վերականգնվող էներգետիկ օբյեկտներ, այդ թվում՝ հողմակայան, արևային ֆոտովոլտային կայաններ: Դասընթացն իրականացվել է Կոնրադ Ադենաուեր հիմնադրամի և Հանուն Մարդկային Կայուն Զարգացման ՀԿ-ի կողմից:
